1. 首頁 > 健康養生 > >

秋高氣爽食松茸

健康知識養生常識

【秋高氣爽食松茸】本文轉自：新民晚報
秋高氣爽食松茸
文章圖片
文并圖/沈一珠
深秋辰光 ， 菌菇正香；煎炸燒烤 ， 松茸為王 。
假使講 ， 秋天是吃菌菇的好辰光 ， 搿末 ， 松茸就是秋天菌菇里的王 。 從前 ， 松茸儕是野生的 ， 一年就長迭能一逮 ， 又只長勒紅松林搭仔黑松林里向；除脫專家 ， 一般人也勿曉得伊迓勒啥地方 ， 所以 ， 老稀奇；而如今 ， 能夠改天換地的人類已經尋著了人工栽培的方法 ， 松茸迭種物事就有了兩種境界：野生的 ， 還是貴得野豁豁；家生的么 ， 也就隨便吃吃了 。 當然咯 ， 可以肯定的是 ， 出啥鈔票 ， 吃啥味道 。
松茸比較好的狀態是頭上那把“傘”像花苞一樣 ， 還沒有打開；傘柄也是粗壯、結實的；迭個辰光 ， 香味道頂頂濃；而眼門前迭一小盒赤松茸 ， 花苞已半開 ， 香味道應該散脫勿少了；曉得伊是從黑龍江翻山越嶺來到上海 ， 又加上疫情年里 ， 更勿曉得要經過多少趟核酸檢測 ， 真真要謝謝天 ， 謝謝人 。
搿天 ， 一小盒赤松茸8只 ， 一半用來燒飯；另外一半面拖 ， 或者叫伊天婦羅 。
松茸飯：松茸4只 ， 用廚房用紙沾著水 ， 輕輕交拿表面的齷齪弄清爽 ， 像削鉛筆一樣拿帶泥的根部以及發黑變質的部分削脫 ， 汏清爽的松茸切成小塊；橄欖油燒熱 ， 松茸倒下去 ， 勿用翻 ， 等香味出來后 ， 加料酒、生抽、鹽以及適量清水燒開 ， 篤一歇就拿松茸撩出 ， 用適量松茸湯水加入淘好的適量大米 ， 飯燒好后 ， 拿松茸鋪勒飯表面 ， 再燜5分鐘左右 ， 盛出來之前 ， 拿飯搭仔松茸拌拌勻 。 好吃得來 ， 滑糯的米飯里有鮮潔的松茸香氣 。
面拖松茸：淀粉里加只蛋 ， 加點料酒 ， 加一點點鹽 ， 調成薄糊；松茸豎起來對半切 ， 或者切成三片；先蘸少許干淀粉 ， 再擺勒蛋糊里拖一拖 ， 入熱油炸到兩面金黃撈出 ， 吸干油 ， 趁熱蘸香醋吃 ， 味道老好 。